निजी विद्यालयलाई टक्कर दिन सरकारी प्राथमिक विद्यालयमा पनि स्मार्ट क्लासको व्यवस्था गरिएको छ। शिक्षक-शिक्षिकाहरूले आफ्नै व्यक्तिगत पहलमा यो स्मार्ट क्लास आरम्भ गरेका हुन्। मटियाली ब्लकको दक्षिण धुपझोड़ास्थित बदिरबाड़ी एसपी प्राथमिक विद्यालयमा शनिवारदेखि स्मार्ट क्लास आरम्भ भयो। अहिले अभिभावकहरू सरकारी विद्यालयभन्दा निजी विद्यालयमा आफ्ना बालक-बालिकालाई पठाउन बढ़ी इच्छुक छन्। त्यसैले समयअनुसार अघि बढ्न स्मार्ट क्लास अत्यन्त महत्त्वपूर्ण भएको छ। शिशुहरूले पुस्तकमा मात्र पढ़ेर भन्दा भिडियोको माध्यमबाट हेरेर सिक्दा सजिलै बुझ्न सक्छन्। यही कारणले बदिरबाड़ी एसपी प्राथमिक विद्यालयका शिक्षक-शिक्षिकाहरूले आफ्नै तलबबाट स्मार्ट क्लास आरम्भ गरेका हुन्। क्लास आरम्भ हुने बित्तिकै विद्यार्थीहरूमा ठूलो उत्साह देखियो र अभिभावकहरू पनि निकै खुशी भए।
एक समय बदिरबाड़ी एसपी प्राथमिक विद्यालय क्षेत्रकै प्रसिद्ध विद्यालयमध्ये एक थियो। त्यति बेला विद्यार्थी सङ्ख्या पनि धेरै थियो। तर समयसँगै यहाँ विद्यार्थीहरूको सङ्ख्या घट्दै गयो। अहिले विद्यालयका पाँच कक्षामा जम्मा 42 जना विद्यार्थी मात्र छन्। विद्यालयमा तीनजना स्थायी शिक्षक र एकजना पार्श्व शिक्षक कार्यरत छन्। विद्यालयका प्रमुख शिक्षिका प्रियङ्का विश्वास, सह-शिक्षक इञ्जामामुल हक, बिप्लव दे र पार्श्व शिक्षक श्यामल छेत्रीले मिलेर यो पहल गरेका हुन्। प्रमुख शिक्षिका प्रियङ्का विश्वासले भनिन्, विद्यार्थीहरूलाई पढ़ाईमा रुचि बढ़ाउन र तिनीहरूलाई विद्यालयमुखी बनाउन नै हामीले यो कदम चालेका हौँ। अब नियमित रूपमा स्मार्ट क्लासमार्फत पढ़ाई हुनेछ। विद्यार्थीहरू पनि स्मार्ट क्लास निकै रमाइलो मानेर सिकिरहेका छन्।
अर्कातिर स्नेहा खेड़िया नामकी एक विद्यार्थीले भनिन्, यति समयसम्म किताबमा मात्रै पढ़ेर बुझ्नुपर्थ्यो। अहिले सबै कुरा कार्टुन र भिडियोको माध्यमबाट देख्न पाइरहेको छु। धेरै रमाइलो लागिरहेको छ। अबदेखि प्रत्येक दिन स्कूल आउँछु।
